L'ABBRISTHÒGAMU - Aperitivu linguìsticu in sassaresu e in sardu

L'assòtziu Su Majolu Prisenta :

L'ABBRISTHÒGAMU

Veni a ciarrà in linga nosthra,pa passà una sera in cumpagnia magnendi e tasendi cosa bona a prèsgiu baratu.

L'atopu è abberthu a cassisia linga di Sardhinga: da lu turritanu a lu gadduresu, da lu sardhu a l'arieresu e a lu tabarchinu.

Si no sei sardhu o no cunnosci nisciuna linga di Sardhigna no t'ài di priocupà: veni lu matessi pa ischubbià cosa è l'assòtziu Su Majolu o pa fatzi cuniscì la linga e la cultura tòia!

Vènnari 20 di Màggiu a l'ori 19:30
Caffè Grillo,Corso Vico 23 - Sàssari

Assòtziu Su Majolu

Sighi a lèghere

Cuncursu de ideas pro su sìmbulu nou

Bandimus unu cuncursu pro mudare su sìmbulu de s'Assòtziu Su Majolu
Chie cheret nos podet imbiare sa proposta sua acumpangiada dae su nùmene e dae su sambenadu a s'indiritzu:
sumajolu@yahoo.com.

Su sìmbulu devet trasmìtere sa determinatzione e su caràtere rivolutzionàriu de sos istudiantes sardos.

B'at tempus dae su 2 de maju a su 30 de làmpadas de su 2016

Su sìmbulu at a èssere votadu dae nois etotu e su mègius at a bìnchere duos prèmios: una malliedda de s'assòtziu e unu libru seberadu dae nois.

Bonu traballu a totus!

Assòtziu Su Majolu

Sighi a lèghere

Tàtari - Presentada de su Prèmiu pro Tesis de Làurea in Sardu M.L. Wagner

Incarca su manifestu pro l'ismanniare

Sa Sotziedade pro sa Limba Sarda at publicadu su bandu de su Prèmiu "Max Leopold Wagner" pro tesis de làurea iscritas in sardu o chi faeddant de linguìstica sarda.

Su prèmiu est partzidu in duas setziones:
1) Tesis de làurea iscritas in sardu, de cale si siat argumentu o facultade. (PRÈMIU 500€).
2) Tesis de làurea chi faeddant de linguìstica sarda, iscritas in cale si siat limba (PRÈMIU 500€).

Podent leare parte a su cuncursu totu is laureados e laureandos chi ant presentadu sa tesi issoro in is ùrtimos 3 annos acadèmicos. S'iscadèntzia pro leare parte a su cuncursu est su 31 de Trìulas de su 2016.

S'assòtziu Su Majolu organizat una presentada de su cuncursu in s'Universidade de Tàtari, pro lu fàghere connòschere a totu is istudiantes de s'ateneu nostru.
Nd'amus a chistionare cun Diegu Corraine, de sa Sotziedade pro sa Limba Sarda.

Sa presentada est giòvia, su 25 de freàrgiu de su 2016 a sas 6:30 de sero, in s'àula H de su Dipartimentu de Istòria, Sièntzia de s'Òmine e de sa Formatzione.
Carrera de Zanfarino 62, Tàtari.

Non manches!

Sighi a lèghere

Cànone, mercadu e normas ortogràficas

Sos romanzos in limba sarda sunt unu fenòmenu literàriu bastante nou chi est nàschidu in sos primos annos 80 e chi ancoras no est connotu meda.
Mancari gasi, sunt paritzos sos iscritores chi ant publicadu unu o prus romanzos in sardu: de custos, calicunu est arribadu a una calidade artìstica bona.
Est de pagos annos a como su primu istùdiu a pitzu de custu fenòmenu literàriu, publicadu cun su tìtulu de Benidores, chi at analizadu custos romanzos in una prospetiva de sa sotziologia de sa literadura, pro aberguare ite difusione e ite pùblicu tenent e si s'est formende o nono unu cànone a livellu linguìsticu e mescamente ortogràficu.

S'autore, Antoni Arca, est un'iscritore aligheresu chi at publicadu paritzos libros in italianu, in aligheresu e in sardu, comente sos romanzos A Ballutango e Tilda de Reni Atora: custu ùrtimu est su frutu de unu traballu de iscritura colletiva giutu a in antis paris cun su corsicanu Ghjacumu Thiers e su catalanu Jordi Buch Oliver.

Su 5 de santandria amus a faeddare paris cun issu de sos romanzos in sardu e de sas problemàticas chi custu fenòmenu at bogadu a pitzu, cumintzende dae sa dificultade de agatare unu pùblicu e unu mercadu culturale bastante mannu (ca sos sardòfonos sunt alfabetizados in italianu ebbia e non sunt avesos meda a lèghere in sa limba naturale issoro) e su pagu interessu chi finas a como ant mustradu pro custu fenòmenu su prus de sos editores e de sos crìticos literàrios.

Bos isetamus a sas 17:00 in s'Aula Q.
Carrera de Zanfarino n° 62, Tàtari. Dipartimentu de Istòria, Sièntzias de s'Òmine e de sa Formatzione


Assòtziu Su Majolu

Sighi a lèghere

Sa tradutzione dae s'àrabu a su sardu de su libru "Segamentu de Ancas"

S'assòtziu Su Majolu su 27 de Santugaine organizat una cunferèntzia in s'Universidade de Tàtari pro chistionare de su libru "Segamentu de ancas".
Est unu libru de contos iscritu dae s'autore sirianu Zakaria Tamer (tìtulu àrabu: Taksir Rukab, Riad el-Rayyes, 2002; tìtulu inglesu: Breaking Knees), bortadu in limba sarda dae Alessandro Columbu e publicadu ocannu cun s'editore Condaghes.

Cun nois at a èssere presente su tradutore, chi nos at a faeddare de su libru e nos at a contare de s'esperièntzia sua e de sas tècnicas de tradutzione chi at impreadu pro furriare custa òpera, giughende a in antis unu cunfrontu linguìsticu e culturale de importu mannu cun una limba faeddada dae prus de 200 milliones de persones.
Unu cunfrontu de importu mannu, amus naradu, fintzas ca est sa limba de sos bighinos nostros, mancari chi los connoschimus pagu: petzi 180 km de mare partzint s'ìsula nostra dae sa Tunisia e duncas dae sas terras arabòfonas.

Alessandro Columbu est nàschidu in Nùgoro in su 1986 e est crèschidu in Ollolai. Est chircadore de literatura àraba contemporanea e insìngiat s'àrabu in s’Universidade de Edimburgo, in Iscòtzia. At istudiadu s’àrabu in Tùnisi, Damascu, Beirut e Amman e s’est laureadu in s’universidade de Bologna in su 2012 cun una tesi subra de Zakaria Tamer. At imparadu a iscrìere in sardu a sa sola leghende contos e romanzos e at comintzadu a bortare contos e artìculos dae s’àrabu in su 2010, publichende·los in Facebook.

S'autore de su libru, Zakaria Tamer, est nàschidu in su 1931 in Damascu (Sìria). Est crèschidu in su bighinadu de al-Bahsa e at fatu sas iscolas fintzas a sos trèighi annos, cando s’est ritiradu e at comintzadu a traballare comente dischente de mastru ferreri. Dae su 1960 a como at publicadu una dusina de regortas de contos, contos pro pitzinneddos e artìculos satìricos. Est connotu in Sìria e in su mundu àrabu in generale pro èssere unu de sos maistros in contu de contos in àrabu, e at traballadu fintzas pro su ministeru sirianu de sa cultura e de s'informatzione e pro unos cantos giornales e rivistas literàrias in Sìria e in aterue. A pustis chi si nch'est infadadu de sa vida in Sìria, paritzos annos a oe at detzisu de si nche tramudare a su disterru e dae su 1981 bivet in Oxford (Gran Bretagna). Dae su 2012 pùblicat fintzas contos e contigheddos in Facebook, in sa pàgina sua personale e in al-Mihmaz. In su 2014 est essidu s'ùrtimu libru suo “Ard al-Wail”, e in su mese de martzu de ocannu at bìnchidu su prèmiu “Mahmoud Darwish Award” de sa fundatzione palestinesa Mahmoud Darwish Foundation.

Sa cunferèntzia, chi faghet parte de su programma "Sa cultura chistionat in sardu" at a èssere martis su 27 de Santugaine a sas 17:00 in s'àula "Cervantes" de su Dipartimentu de Sièntzias Umanìsticas e Sotziales, in carrera de Roma 151, in Tàtari.


Assòtziu Su Majolu

Sighi a lèghere

Escursione Àrcheo-Naturalìstica

S' Assòtziu - Su Majolu organizat un'escursione àrcheo-naturalìstica in su sartu de Bortigale.

Amus a praticare sas àndalas e sos caminos chi nos nche leant a sos nuraghes de Òrolo, Carrarzu Iddia e Tintirriolos, fintzas a nche pigare a Santu Padre. Dae inoghe, a 1026 metros, amus a pòdere mirare totu su pranu de Abbasanta e s'istèrrida de su Màrghine.

-S'EVENTU EST PETZI PRO 30 PESSONES-

-CUOTA PRO LEARE PARTE ---> 3 €

Pro bos prenotare e pro informatziones mutide custu nùmeru: 3479221197


-PROGRAMMA-

- A sas 8:30 tucamus dae sa localidade Costa'e Mòlinu (Bortigale).
- A sas 10:00 lompimus a s'àrea archeològica de Òrolo - Carrarzu Iddia - Tintirriolos.
- A sas 13:30 papamus in su monte Santu Padre (1026m.).
- A oras de sas 17:00 nde calamus in su caminu "Manai" pro nde lòmpere torra in Bortigale.

- - DE IMPORTU - -

- Cadaunu si batat: A papare - A bufare - Botinos pro escursione - Bonete pro su sole.

P.S. Pro chie at a importu a compudare nuraghe Òrolo, si giutat una lughe portatile.


Assòtziu Su Majolu

Sighi a lèghere

Sos Machines de Tziu Bachis

Ispetàculu teatrale in limba sarda de sa cumpangia teatrale "Limba e Ammentu" de Abbasanta.
Ant a retzitare "SOS MACHINES DE TZIU BACHIS", una cummèdia in tres atos de Mario Deiana, chi est un'adatamentu lìberu de sa cummèdia "Le malade imaginaire" de Molière.

S'ispetàculu at a èssere in sa corte de su Dipartimentu de Istòria, Sièntzias de s'Òmine e de sa Formatzione de s'Universidade de Tàtari

Carrera de Zanfarino n° 62.

Eventu FB: https://www.facebook.com/events/984032008276078/

Acudide in medas!

Sighi a lèghere

Su sardu est in su coro

Cursu de limba sarda

Dae su 7 de Santandria de su 2014 at a cumintzare unu cursu de sardu pro imparare sas regulas printzipales de sa limba sarda.

Su cursu est partzidu in 6 letziones de un'ora e mesa cadauna.

Sas letziones ant a èssere cada Chenàbura a sas 19:30 in Macumere in Cursu de Umberto I n°64.

Sas letziones ant a èssere fatas dae Agostino Sanna (Operadore Linguìsticu)

S'iscritzione a su cursu est de 5€

Pro bo iscrìere mutide unu de custos nùmeros: 3479221197 - 3403555054 o si nono andade in Cursu de Umberto n°64.

Movide·bos ca sos postos sunt pagos!

Eventu organizadu dae s'Assòtziu Su Majolu e Valèria Tola CERAMICHE.

assotziusumajolu.blogspot.it
sumajolu@yahoo.com
valeriatolaceramiche@gmail.com


Assòtziu Su Majolu

Sighi a lèghere

DAE SU 21 DE MARTZU "ISTUDIAMUS IN SARDU"

Torrat a comintzare su seminàriu in sardu organizadu dae s'assòtziu Su Majolu in s'Universidade de Tàtari, a pustis de una pàusa de carchi mese.
S'annu coladu amus arresonadu de limba sarda paris cun Diegu Corràine, Màriu Puddu e Brunu Sini in unu cursu chi est duradu dae Maju a su mese de Trìulas e chi ant fatu paritzos istudentes.
Ocannu su seminàriu, l'amus partidu in cunfèrentzias chi ant a faeddare in sardu de limba, istòria e literadura sarda, pedagogia bilìngue, polìtica linguìstica e de àteros argumentos de interessu mannu.
Sas primas duas cunferèntzias, su 21 e su 22 de martzu, las faghet su professor Federicu Francioni, chi at a faeddare de sa Rivolutzione Sarda dae su tempus de Zommaria Angioy a su 1812.
Su 28 e su 29 de Martzu ant a bènnere duos professores chi ant a faeddare de literadura: su 28 Antoni Arca at a faeddare de sos romanzos in limba sarda e su 29 Micheli Pinna nos at a contare de sos iscritores prus antigos che a Araolla, Garipa e Madau.
A pustis ant a bènnere Maria Vitòria Migaleddu, Diegu Corràine, Pepe Coròngiu e àteros istudiosos.
Su seminàriu lu faghimus cada giòbia e chenàbura a sas 5 de bortaedie in s'àula O, in sa ex Facultade de lìteras, in su de tres pianos.
Su seminàriu est a gratis, pro bos prenotare mutide a su nùmeru 3479221197.

Sighi a lèghere

Sèbera su Sardu

Ocannu, a pustis de trèighi annos chi b'est sa lege italiana 482/99, s'Ufìtziu Regionale de sas Iscolas est faghende rispetare custa lege. Una paja de dies faghet su Diretore de s'Ufìtziu lis at mandadu una lìtera a totu sas iscolas sardas narende chi depent pònnere s'optzione pro isseberare s'imparu de su sardu in sos mòdulos pro sas iscritziones pro s'annu 2013/2014. Est unu diritu de totu sos sardos. Su chi pro sèculos s'Istadu italianu at proibidu a totu sos sardos, como est unu diritu chi nos devimus collire.

PEDIMUS A TOTU SAS MAMAS E SOS BABBOS SARDOS CHI LIS DIANT A SOS FìGIOS SA POSSIBILIDADE DE ISTUDIARE SU SARDU IN ISCOLA!

Sighi a lèghere