13/12/12 - MANIFESTAMUS PRO SA LIMBA NOSTRA!

Sa “Carta Europea de sas Limbas Regionales e de Minoria” est unu tratadu internatzionale de su 1992 chi s'istadu italianu no at mai ratificadu e como est faghende una lege in Parlamentu pro lu ratificare. Su guvernu italianu, bidu chi podet seberare cale livellu de tutela pònnere, cheret discriminare sos sardos in custu puru, comente at semper fatu in cada cosa.

Difatis, sunt faghende un'ischirriadura chene motivu, ponende a sa limba sarda sa tutela prus bassa e a su tedescu, frantzesu e islovenu sa tutela prus arta.

Su sardu est sa segunda limba prus faeddada in sa Repùblica Italiana, a pustis de s'italianu, cun prus de unu millione de pessones chi lu faeddant e sos sardos devent aere su diritu de l'impreare cantu e prus de s'italianu, in totu sa vida pùblica de Sardigna comintzende dae sas iscolas, sos ufìtzios pùblicos e sos mèdia.

Pro custu cherimus chi in sa ratìfica de sa Carta siant garantidos: s'imparu fintzas in sardu in totu sas iscolas e in sas universidades sardas (artìculu 8 paràgrafu 1, ai, bii, cii, dii, eii, fii, g); su diritu de fàghere una dimanda e retzire una risposta in sardu in sos servìtzios pùblicos ammaniados dae sas autoridades amministrativas o dae àteras pessones chi traballant pro contu de cuddas (artìculu 10 paràgrafu 3, b); una televisione, una ràdiu e unu giornale chi essat cada die totu in limba sarda (artìculu 11 paràgrafu 1, ai, bi, ci, d, ei, fi, g). Pro su chi pertocat sa formatzione de sos insegnantes, cherimus chi su Parlamentu Italianu, (in prus de pònnere sa faina de tutela art. 8 par. 1, g) si movat abberu pro garantire s'istitutzione de Cursos de Làurea pro formare sos mastros e sos professores de limba sarda, si est netzessàriu fintzas dende una deroga a sas normas subra de s'istitutzione de sos cursos de làurea novos chi at postu sa Riforma de s'Universidade.

Pensamus chi custas sunt sas cosas prus de importu pro pesare una polìtica linguìstica noa in Sardigna, ca ponende su sardu in iscola, in sos ufìtzios pùblicos e in sos mèdia si diat dare una prospetiva de agatare unu traballu a giòvanos sardos meda e custa diat èssere sa menzus manera pro lis faghere torrare a impreare e a istudiare sa limba nostra.

Bos mutimus a manifestare pro custa initziativa e in totu sas àteras chi su pòpulu sardu at a organizare, pro difendere sos diritos nostros dae cust'àtera picada in giru contr'a sos sardos!

SIT-IN, GIÒVIA SU 13 DE NADALE

a sas 10 de manzanu, in pratza de s'Universidade, Tàtari

Sighi a lèghere

Subra sa denùntzia de s’Universidade de Tàtari contra s’ischirriadura de su sardu a opera de su guvernu italianu.

Cun piaghere, amus ischidu dae s’imprenta sa nova chi s’Universidade de Tàtari, cun una delìbera de su senadu acadèmicu, denùntziat s’ischirriadura posta in campu dae su guvernu italianu a istrobbu de sa limba sarda, chi non benit leada in cussideru commente limba dinna de èssere tutelada in sa matessi manera de su tedescu, frantzesu e islovenu.Difatis unu provedimentu postu dae su guvernu in su decretu lege subra sa “Spending Review”, istabilit chi no ant a pònnere prus dirigentes iscolàsticos a tempus indeterminadu in sas iscolas chi tenent prus pacu de 600 iscritos. Dae custu provedimentu sunt escluidos su Sud-Tirol, Valle d’Aosta e sos zassos de limba islovena de su Friuli chi, sunt logos populados dae zente cun particularidade limbìstica e ant a bìere su nùmeru minimu de iscritos reduidu a 400. In Sardigna imbetze, mancari su sardu siat una limba tutelada dae sa lege 482 de su 1999, commente su tedescu, su frantzesu e s'islovenu, at a essere postu unu limite minimu che in su restu de s’istadu.Su proite custa delìbera pro nois siat de importu mannu est chi paret chi si cumintzet a reconnòschere chi sa limba est fintzas un’aina de proposta polìtica e econòmica.In virtude de su nostru èssere populu, cun istòria, cultura e limba (e de minorias limbìsticas commente sos àteros populos de Europa), depimus pretèndere chi su chi nos tocat segundu sas leges benzat respetadu e depimus gherrare in manera chi nos benzat reconnotu su diritu de ordinzare a piaghere nostru sas istitutziones iscolàsticas, universitàrias e sos caminos de formatzione, dande contu petzi a su populu nostru e leande in cussideru su balanzu e su zudu chi nde podet tènnere sa zente nostra.Sunt giai colados paritzos meses cando amus presentadu a su Retore Attilio Mastino una dimanda inue, milli istudiantes de s’Universidade de Tàtari pedint chi benzant abertos duos cursos de laurea pro pesare mastros e professores chi potant insinzare su sardu e sa didàtica in custa limba in sas iscolas. A die de oe, no nos ant torradu resposta peruna e isperamus chi s’Universidade de Tàtari potat leare parte cun nois a sa chistione chi si est zustu pretèndere sa nostra ispetzialidade limbìstica pro costoire sos postos de traballu de dirigente iscolàsticu, est zustu galu de prus dare a sa limba nostra una dinnidade chi li deghet, reconnoschinde chi su sardu depet balanzare importàntzia chepare a s’italianu in totu sos zassos de sa vida pùblica in Sardigna, a cumintzare dae sas iscolas e sas universidades inue ant a bènnere a nàschere logos noos de traballu. Pro nois est de importu mannu chi s’Universidade si ponzat commente obietivu de base cussu de lòmpere a su perfetu bilinguismu tra italianu e sardu in tota sa Sardigna, ma fintzas sa paridade de sas àteras limbas faeddadas dae sos sardos (su tataresu, su gadduresu, s’aligheresu e su tabarchinu) in sas comunas inue benint impitadas. A·i custu bi podimus lòmpere a bellu a bellu, ma est fundamentale chi benzat reconnotu custu obietivu. Su Sòtziu Su Majolu (30 de trìulas)

Sighi a lèghere

Nucleare? In Sardigna Detzidimus Nois!

S'assòtziu “Su Majolu” giamat sos istudentes e totu su pòpulu sardu a un’ addòbiu pro nos informare subra sos perìculos de su nucleare in Sardigna e pro batire a innantis sa gherra contr’a sas centrales nucleares chi nos cheren pònnere in terra nostra!A sas 4 de borta e die, in s’Aula Umanìstica de sa Facultade de Lìteras, an a faeddare sos espertos de energia nucleare, sos comitados e sos partidos sardos pro narrere EJA a su Referendum de su 15 de Maju co

ntr’a su nucleare in Sardigna. A pustis b’at a essere un’arrèjonu cun totu sa zente chi at a bennere.
Dae sas 8 de sero , in su tzìrculu Dopolavoro Ferroviario (a costazu de s'Istatzione de sos trenos), su sòtziu culturale Aziru ammanizat unu sero de teatro e mùsica contr'a su nucleare: Sa EX Q teatro e sa cumpanzia teatrale Ouroboros an a rapresentare s'ispetàculu "Stop Radio Activity". A pustis microfono liberu cun mùsica rap nugoresa S'Acru, Malam, Bichinau Dub 'n Funk e DJ set cun Lupro & Jack.
Dalle 16:00 incontro-dibattito nell’Aula Umanistica della Facoltà di Lettere e Filosofia e dalle 20:00 musica e teatro presso il circolo Dopolavoro Ferroviario.

CONTR’A SU NUCLEARE IN SARDIGNA E IN TOTU SU MUNDU!

A Sassari il 6 Maggio 2011
In Tàtari su 6 de Maju de su 2011

Sighi a lèghere