Solidariedade a Luisu Caria

S'Assòtziu "Su Majolu" est acurtzu a Luisu Caria, chi giòbia sero est istadu frimmadu dae sa giustìtzia in su mentres chi fiat faghende volantinàgiu e est istadu leadu a caserma pro èssere cumpidadu.

Luisu Caria est unu de sos istudentes chi faghent parte de s'Assòtziu Su Majolu. Issu comente àteros, in sos ùrtimos annos, s'est impinnadu meda pro s'amparu de sa limba sarda e pro àteras gherras in su territòriu, ponende·bi tempus e dinare. Difatis chie lu connoschet podet abarrare petzi ispantadu dae custa faina.
Est unu pitzocu chi gherrat cun totu su coro e sa matessi cosa la fiat faghende s'àteru sero in Nùgoro, cando fiat cumpartzinde volantinos contra a sa caserma chi sunt fraigande in sos terrinos de su demàniu tzìvicu. In cussu mamentu est istadu frimmadu dae sas guardias e leadu a caserma, in ue l'ant fatu ispozare de su totu in chirca de droga.
Segundu a nois custas sunt atziones fatas pro assustare sos militantes e pro fàghere a manera chi non si impinnent prus in sa luta pro s'emantzipatzione de su pòpulu sardu.
Damus totu sa solidariedade nostra a Luisu chi est unu de nois e fintzas a s'organizatzione sua.

Assòtziu de sos Istudentes Sardos - Su Majolu

Sighi a lèghere

Eletziones ERSU 2013, votade Lisandru Loi

Pro sas eletziones de sos rapresentantes de s'Ersu de Casteddu votade Lisandru Loi.

Su 21 e su 22 de Maju sos istudentes ant a votare pro elègere sos rapresentantes issoro in su consìgiu de amministratzione de s'Ersu.

Ocannu b'at unu candidadu de Scida, unu assòtziu de giòvanos indipendentistas, chi at iscritu in su programma suo chi cheret fàghere intrare sa limba sarda in s'Ente pro su deretu a s'istùdiu de Casteddu. Lisandru Loi, custu est su nùmene de su candidadu, si at a èssere eletu at a gherrare fintzas pro fàghere a manera chi totu sos documentos ufitziales de s'Ersu siant fintzas in sardu. Est sa prima borta chi sos istudentes chi gherrant pro sa limba sarda giughent sa possibilidade de intrare in sas istitutziones universitàrias e pro custa resone isperamus chi su candidadu de Scida siat eletu. S'Assòtziu Su Majolu pedit a totus sos istudentes de Casteddu de votare Lisandru Loi e de agiudare sa campagna pro lu fàghere elègere.

Assòtziu de sos Istudentes Sardos – Su Majolu

Sighi a lèghere