Fintzas a su comintzu de su millienoighentos, a sos pitzinnos de sas biddas chi andaiant a istudiare a Casteddu, los mutiant "Is Majolus".
Picamus su nùmene dae custos istudentes sardos, chi istaiant in tzitade arrangèndesi, faghende sos traballeddos chi agataiant.
Su chi cherimus fàghere est a pònnere paris sos istudentes chi cherent chi sa limba e sa cultura de su pòpulu sardu non siant prus postas a una banda e emarginadas dae sa bida pùblica, cumintzende a la fàghere istudiare in totu sas iscolas sardas;cherimus pònnere paris sos chi cherent gherrare pro su sardu ufitziale a intro de su tzentru prus mannu de fraigadura de s'egemonia culturale italiana in Sardigna: s'Universidade, chi no at mai leadu a cunsideru sa limba nostra digna de èssere rispetada e chi at una curpa manna de sa de-sardizatzione de sos sardos.
Nois pessamus chi su sardu depet èssere ufitziale, faeddadu in totu sa bida pùblica de sa sotziedade sarda, pro paritzos motivos, totu de importu:
-Natzionale-istòricu: Ca est sa nostra, sa limba istòrica de su populu sardu, sa limba chi nos agiuat a cumprèndere sa cultura nostra. Nos servit pro ischire chie semus nois etotu, pro non diventare zente chene un'identidade sua, chi non s'ammentat chie fit, no tenet cussèntzia de chie nd'est e chi non podet fraigare su cras de fizos suos.
-Democràticu: Ca est sa limba chi faeddat sa parte prus manna de sos sardos e su de la pòdere faeddare in totu sos locos e chin totus, de l'iscrìere e de l'istudiare est unu deretu democràticu fundamentale (reconnotu dae sas cartas europeas e internatzionales) chi galu oe est negadu pro su pòpulu nostru.
-Sotziale: Ca torrande·li sa dignidade sua a sa limba nostra, li cherimus torrare sos deretos issoro a totu sos chi la faeddant de prus: sos trabballadores, sos pòberos, sos chi no ant istudiadu, sos chi istant allargu dae sas tzitades mannas, sos betzos e totu sos sardos.
-Educativu: Ca s'ùnica manera chi sos pitzinnos no ammisturen prus duas limbas e faeddent bene su sardu e s'italianu est de lis imparare ambas duas sas limbas in s'iscola. In custa manera sos istudentes sardos chi si diplomant e si làureant ant a èssere meda de prus de oe, bogande·nche una de sas causas de s'abbandonu. L'aiat giai cumpresu Juanne Matiu Garipa in su 1627 cando at iscritu, in su "Pròlogu de su Legendàriu" suo, chi si a sos pitzinnos lis aeren imparadu a lègere e iscrìere su latinu partinde dae sardu, imbetzes chi dae s'ispagnolu, bi fint istados deghe bortas prus omines istudiados in Sardigna.
…................
Cherimus agiuare su sardu in su caminu cara a s’ufitzialidade.
Pro totu custu, su de sa limba est unu pensamentu chi pertocat sa sotziedade, sa terra nostra e sa cussèntzia de totu sa zente chi lu bivet. Nois pensamus chi sa limba sarda in die de oe no est cunsiderada po su chi balet; pensamus chi su logu sou tiat a dèpere èssere fintzas s’ufitzialidade e cherimus cumbìnchere de custa cosa totu sos chi pensant chi sa limba est cosa antiga, destinada a iscumpàrrere a suta de sa mola de sa modernidade.
Non podimus abarrare frimmos faeddande cun dispiaghere in limba italiana a susu de sa limba nostra comomai cuntaminada. Non podimus tìmere de chistionare in sardu ebbia puite no resessimus a tocai cun sos faeddos sa “puresa” de sa faeddada antiga. A pagu cosa serbit pensare a commente fiat sa limba de jaju e a commente pòdere fàghere pro torrare a chistionare su sardu in sa manera sua; cada limba cambiat cun su tempus e totugantus ischimus chi s’ingresu de oe no est s’ingresu faeddadu in su millienoighentos.
Est a nàrrere, po incummintzare a l'agiuare, su sardu tocat a lu faeddare.
Lu cherimus fàghere faghinde adòbios, cuntzertos, cursos de limba e àteras cosas chi tenent cuncretesa; no cherimus fàghere a manera de cuddu chi si chensaiat setzidu in sa mesighedda de s'aposentu sou.
Tenimus rispetu de sa limba italiana e teneus rispetu po totu sas limbas de su mundu; a cada modu pensamus chi est ora de torrare su rispetu a sa limba nostra chi a fortza de s’imbrenugare po fàghere logu a s’italianu s’est sichende sas ancas.
Cherimus chi sos studentes sardos tengiant su deretu de istudiare sa limba cosa nostra.
A la torrare a bìere currinde in onnia boghe!
