Su Majolu in Capofrasca contra s'invasione militare

Nos semus semper impinnados in s'amparu de sa cultura e de sas richesas de s'Ìsula nostra, sas matessi chi como sunt cumpromìtidas dae un'invasione militare chi est lassende mortos e incuinamentu.

Non podimus prus suportare chi sa Sardigna bèngiat impreada pro allenamentos de gherra chi dant su comintzu a massacros de milli e milli persones.

Non suportamus, chi, cun sa complitzidade de sas istitutziones, si potzat pensare chi custas iscolas de gherra bèngiant propostas comente fontes de isvilupu econòmicu.

Custu sistema est ponende in sa conca de sos giòvanos nostros, chi pro àere unu traballu sèberant cussu caminu, ideas ultra-natzionalistas e ratzistas chi afòrtigant su mitu farsu de su sordadu chi giughet sa paghe peri su mundu.

Pensamus chi petzi s'echilìbriu giustu tra sustenibilidade ambientale, ètica e bisòngios reales de sa terra nostra, nos potzat permìtere un'isvilupu sanu in una terra de paghe.

Pro custos e pro àteros motivos s'Assòtziu Su Majolu aderit a sa manifestatzione de su 13 de Cabudanni in Capofrasca.

Assòtziu Su Majolu

Sighi a lèghere