Comente cada annu, fintzas ocannu
cherimus fàghere unu resumu de totu sas atividades chi amus fatu.
Creimus chi siat giustu chi totu sos chi nos ant sustènnidu in custu
2015 siant parte ativa de su chi faghimus e de su chi amus a fàghere.
Sa fortza pro sighire in custu traballu nos l'ant semper dada sos
sustenidores nostros e si ant a chèrrere amus a sighire in custa
òpera. Pensamus chi su riscatu sotziale e culturale de su pòpulu
sardu siant sas pedras de fundamentu pro fraigare una sotziedade noa,
uguale e pròspera, chi siat aberta a su mundu.
Su 2015 l'amus cumintzadu in Mont'e Prama. S'iscavu archeològicu prus importante de su mediterràneu
fiat abertu, sena bardiamentu, cun s'arriscu chi sos tumbarolos
fagherent dannu. Nch'amus giutu agigu de linna a sos pitzocos chi,
pro protesta, nch'ant coladu dies e notes in ie, in su fritu. Sos
resurtados sunt arribados a pustis de paritzas dies: sa
sovrintendèntzia at installadu una rete perimetrale e un'impiantu de
telecàmeras.
Non sunt mancadas sas denùntzias de
discriminatzione pro su chi pertocat sa limba sarda in
s'universidade. Pensamus chi sos istudiantes si diant dèvere
intèndere lìberos de iscrìere e de espònnere sa tesi in sardu.
Custu a dolu mannu est possìbile petzi in determinados casos. In sos
meses imbenientes amus a apretare s'Universidade de Tàtari a manera
chi su sardu nch'intret a su nessi in sos traballos de tesi.
Sa Die de sa Sardigna non podiat mancare in su calendàriu nostru. Amus visitadu totu sos dipartimentos de s'Universidade de Tàtari cumpartzende e distribuende adesivos e materiale informativu pro ammentare sa die de sa pàtria sarda.
Non sunt mancados sos momentos de
ispàssiu. In pare cun su Tumbao 3.0 amus organizadu a Tirrindò
2015. In su mese de Maju
imbetzes sa cumpangia teatrale Limba e Ammentu
de Abbasanta nos at fatu a rìere cun “Sos machines de tziu
Bachis”.
Su
cuntatu cun s'ambiente e cun sos sitos archeològicos est de importu
pro connòschere su territòriu e s'istòria nostra. Unu bellu sàbadu
de Làmpadas amus praticadu sos caminos chi nch'andant a sos nuraghes
Òrolo, Carrarzu
Iddia e Tintirriolos,
fintzas a nche cròmpere a monte
Santu Padre, in
Bortigale.
A pustis de s'istiu
amus torradu a traballare in intro de s'universidade. Amus ordingiadu
una sèrie de cunferèntzias numenadas “Sa cultura chistionat in
sardu”, faeddende de archeologia, literadura, musicalidade e
minorias linguìsticas. Pro custu torramus gràtzias a Nicola Dessì,
a Alessandro Columbu, a Antoni Arca, a Bustianu Pilosu, a Francesca
Ruiu, a Liliana Pinducciu e a Alessandra Carta. Pro seguru cun custu
progetu amus a sighire in su 2016.
In
s'ìnteri amus leadu parte a sas batallas contra a sa
militarizatzione de s'ìsula e contra a s'esertzitatzione Trident
Juncture in Casteddu e in
Teulada.
Torrende·bos
gràtzias pro nos àere sustènnidu in custas batallas, bos
rinnovamus sos augùrios pro s'annu nou, in manera chi su 2016 siat
mègius de su chi nch'est coladu.
A largos annos.
Assòtziu Su Majolu