17:31:00
Est unu libru de contos iscritu dae s'autore sirianu Zakaria Tamer (tìtulu àrabu: Taksir Rukab, Riad el-Rayyes, 2002; tìtulu inglesu: Breaking Knees), bortadu in limba sarda dae Alessandro Columbu e publicadu ocannu cun s'editore Condaghes.
Cun nois at a èssere presente su tradutore, chi nos at a faeddare de su libru e nos at a contare de s'esperièntzia sua e de sas tècnicas de tradutzione chi at impreadu pro furriare custa òpera, giughende a in antis unu cunfrontu linguìsticu e culturale de importu mannu cun una limba faeddada dae prus de 200 milliones de persones.
Unu cunfrontu de importu mannu, amus naradu, fintzas ca est sa limba de sos bighinos nostros, mancari chi los connoschimus pagu: petzi 180 km de mare partzint s'ìsula nostra dae sa Tunisia e duncas dae sas terras arabòfonas.
Alessandro Columbu est nàschidu in Nùgoro in su 1986 e est crèschidu in Ollolai. Est chircadore de literatura àraba contemporanea e insìngiat s'àrabu in s’Universidade de Edimburgo, in Iscòtzia. At istudiadu s’àrabu in Tùnisi, Damascu, Beirut e Amman e s’est laureadu in s’universidade de Bologna in su 2012 cun una tesi subra de Zakaria Tamer. At imparadu a iscrìere in sardu a sa sola leghende contos e romanzos e at comintzadu a bortare contos e artìculos dae s’àrabu in su 2010, publichende·los in Facebook.
S'autore de su libru, Zakaria Tamer, est nàschidu in su 1931 in Damascu (Sìria). Est crèschidu in su bighinadu de al-Bahsa e at fatu sas iscolas fintzas a sos trèighi annos, cando s’est ritiradu e at comintzadu a traballare comente dischente de mastru ferreri. Dae su 1960 a como at publicadu una dusina de regortas de contos, contos pro pitzinneddos e artìculos satìricos. Est connotu in Sìria e in su mundu àrabu in generale pro èssere unu de sos maistros in contu de contos in àrabu, e at traballadu fintzas pro su ministeru sirianu de sa cultura e de s'informatzione e pro unos cantos giornales e rivistas literàrias in Sìria e in aterue. A pustis chi si nch'est infadadu de sa vida in Sìria, paritzos annos a oe at detzisu de si nche tramudare a su disterru e dae su 1981 bivet in Oxford (Gran Bretagna). Dae su 2012 pùblicat fintzas contos e contigheddos in Facebook, in sa pàgina sua personale e in al-Mihmaz. In su 2014 est essidu s'ùrtimu libru suo “Ard al-Wail”, e in su mese de martzu de ocannu at bìnchidu su prèmiu “Mahmoud Darwish Award” de sa fundatzione palestinesa Mahmoud Darwish Foundation.
Sa cunferèntzia, chi faghet parte de su programma "Sa cultura chistionat in sardu" at a èssere martis su 27 de Santugaine a sas 17:00 in s'àula "Cervantes" de su Dipartimentu de Sièntzias Umanìsticas e Sotziales, in carrera de Roma 151, in Tàtari.
Assòtziu Su Majolu
